ILOILO CITY – Indi pa sigurado nga magapadalagan si anay Presidente Donald Trump sa pala-abuton nga 2024 presidential elections sa Estados Unidos.
Ini bangud nga halos wala na sang pagsalig kay Trump ang Republican party bangud sa kapaslawan sini nga matib-ong ang partido subong nga midterm elections.
Suno sa personal aide sang anay presidente, posible nga sa Martes iga-anunsiyo ni Trump ang presidential bid.
Sa pinakaulihi nga resulta sang election, nakuha sang Democrats ang majority seats sa senado kag dako man ang posibilidad nga makuha man ang majority seats sa House.
Ang Democrats amo ang political party nanday President Joe Biden kag Vice President Kamala Harris.
Sa interview sang Bombo Radyo kay Atty. Joenar Pueblo, political law professor sa University of San Agustin, iya ginpahayag nga dako kuntani ang paglaum sang Republicans nga matabo ang red wave ukon madominar sang ila political party ang election.
Dugang pa niya, posible nga si Florida Governor Ron DeSantis ang mangin frontrunner sang Republicans sa 2024.
Sa bahin naman sang Democrats, mas madali nga mapasar ang mga political platforms kag ang mga polisa ang madikta ni Biden.
Lakip sa mga agenda sang Democrats amo ang progressive tax system, higher minimum wages, Social Security, universal health care, public education, kag subsidized housing.
Mahapos man para kay Biden nga magpangayo sang suporta nagikan sa Congress kun budget appropriations ang pagahambalan.
