ILOILO CITY – Ginpisa-pisa ni Senate Deputy Minority Leader Risa Hontiveros ang Commission on Audit bangud sa atrasadp nga pagpagwa sang special audit sang transaksyon sang gobyerno sa Pharmally Pharmaceutical Corporation.
Sa ginpatigayon nga Senate plenary deliberations sa poposed 2023 national budget, ginpangayuan ni Hontiveros ang Commission on Audit sang update sa status sang special audit.
Gin-mention ni Hontiveros ang report sang January nga nagapahayag nga nagaplano ang special audit team sang ahensya nga magpagwa sang findings sang nagligad nga Marso.
Suno kay Senator Sonny Angara nga amo ang nag-defend sang budget sang state audit agency, ang Commission on Audit ang yara na sa “final stages” kag ang kumpleto nga report ang lauman sa masunod nga duha ka bulan.
Apang, suno naman kay Hontiveros, nagpasalig ang ahensya nga magapagwa ini sang report sa Pharmally deals sa katapusan sang 2021.
Ginkwestiyon man sini kun ngaa nga duha na ka tuig ang nakaligad apang delayed sa gihapon.
Dismayado man ini bangud nga ang Commission on Audit kuntani ang ginasaligan sang Senado kag Kongreso sa pagbantay sang public funds.
Ginpaathag ni Angara nga ang chairman nga si Gamaliel Cordoba ang bag-o gid lamang nga nagpungko apang nagpasalig nga mapasa ang report sa sulod sang duha ka bulan.
Dugang pa niya, ang ahensya ang may yara na sang initial findings apang, yara pa sa proseso sang corrections kag pagkuha sang confirmation ukon affirmation nagikan sa mga tawo nga involved.
Nagpasalig man ang Commission on Audit nga ini na ang katapusan nga extension sang report.
Sang 18th Congress, nagpatigayon sang imbestigasyon ang Senate Blue Ribbon Committee sang P42 billion worth sang COVID-19 funds nagikan sa Department of Health sa Department of Budget and Management-Procurement Service.
Gin-imbestigaran sang senado ang pagbakal sang P8.6 billion nga face masks, face shields kag mga personal protective equipment nagikan sa Pharmally mga may yara gid lamang sang P625,000 nga paid-up capital sang nagsulod sa government transactions.
Sa ginpatigayon nga hearing sang Septyembre sang nagligad nga tuig, ginpahayag sang Commission on Audit nga nagsugod na sila sa special audit sa deal sang Procurement Service sang Department of Budget and Management sa Pharmally.
