Gin-aprubahan na sang isa ka panel sa Kamara ang amendments sa kontrobersyal nga hagna nga nagaduso sa pagtukod sang sovereign wealth fund sa Pilipinas.
Lakip sa pagbag-o sa House Bill No. 6398 nga aprubado sang House Committee on Banks and Financial Intermediaries amo ang pagbalik sang Maharlika Wealth Fund sa original name sini nga Maharlika Investment Fund.
Suno pa sa chairman sang panel nga si Representative Irwin Tieng, dumilian ang proposed Maharlika Investment Corporation nga mag-manage sang anuman nga kumpaniya ukon negosyo kun sa diin ini naga-invest.
Aprubado man ang probisyon nga i-appoint ang finance secretary bilang chairman sang Board of Directors sang Maharlika Investment Corporation.
Buot silingon sini, kakason ang katungdanan nga iya kuntani sang presidente sang Pilipinas.
Ini kasunod sang kahangawa sang pila ka mamalidha nga posible ma-“politicize” ang fund kun presidente ang mangin pinuno sang board.
Magluwas diri, sa baylo nga duha, apat na ang independent board of directors halin sa private sector nga amo ang magabug-os sa 15-member board.
May yara man sang advisory body sa korporasyon nga pagabug-usan sang secretaries sang budget kag socioeconomic planning amo man sang national treasurer.
Gin-aprubahan man sang committee ang bag-o nga version sang bill nga nagakakas sang national budget kag Social Security System kag Government Service Insurance System bilang seed capital.
Sa baylo sini nga major pension funds, kuhaon ang initial investment sa Land Bank of the Philippines (P50 billion), Development Bank of the Philippines (P25 billion), kag Bangko Sentral ng Pilipinas (100% sang dividends).
Nagsugtanay man ang mga mamalidha nga magpain sang 20% sang net profit sang Maharlika Investment Fund para sa social welfare services.
Ginalauman nga mapasar sang Kamara sa second reading subong nga semana ini nga hagna nga ang authors nagalakip kanday House Speaker Martin Romualdez kag presidential son Ilocos Norte Rep. Sandro Marcos.
Natalana sa Myerkules ang last session sa Kamara antes mag-break ang mga mamalidha sa sulod sang isa ka bulan para sa holidays.
