Plano sang duha ka gang leaders nga mag-file sang kaso batok kay suspended Bureau of Corrections chief Gerald Bantag matapos gin-alegar nga nagpangbuno ini samtang hubog sa sulod mismo sang New Bilibid Prison.
Si BuCor Officer-in-Charge Gregorio Pio Catapang ang nagpresentar kanday Jonathan Cañete sang Batang Cebu gang kag Ronald Usman sang Batang Mindanao gang.
Suno kay Catapang, magahingyo siya sa Commission on Human Rights nga buligan ang duha ka gang leaders sa pag-file sang kaso batok sa suspended BuCor chief.
Suno kay Usman, magareklamo siya bangud naparalyze gid ang iya tuo nga kamot bangud ginbuno ni Bantag sang Pebrero 1,2022.
Ginapahayag nga nabun-an naman si Cañete sa iya wala nga paa sang amo man nga adlaw.
Ginapahayag nga natabo nga insidente sang Pebrero sang ginpatawag sila sa opisina ni Bantag kasunod sang pag-eskapo sang isa ka preso sang Enero.
Suno pa sa gang leaders, tuman ka hubog si Bantag rason nga nagpanakit ini tubtub nga nagpangbuno.
Pagkaaga suno sa duha ka gang leaders, ginpatawag sila liwat kag ginhatagan sang P50,000 kag ginpahog nga mas madamo ang ila nga problemahan kun indi pagbatunon ang ginatanyag nga kuwarta.
Temporaryo nga suspended si Bantag sa iya nga pwesto bangud sa gina-alegar nga involvement sini sa pagpatay sa veteran broadcaster nga si Percy Lapid.
