ILOILO CITY – Gin-akusaran sang Chinese embassy sa Manila ang Estados Unidos nga nagaguba sang relasyon sang China kag Pilipinas matapos ginpahayag sang US State Department nga ang Chinese vessels nga nagapalibot sa Spratlys ang nagatublag sa pangabuhian sang mga Pilipino sa lugar.
Sa isa ka statement, ginpahayag sang Chinese embassy nga padayon nga nagapahilabot ang Estados Unidos sa dispute sa West Philippine Sea kag ginaguba ang relasyon sa mga pungsod sa rehiyon, nagatuga sang tension kag nagahalit sa kalinong kag stability sa lugar.
Una na nga ginpahayag ni US Department of State spokesperson Ned Price nga suportado sang Estados Unidos ang panawagan sang Pilipinas sa China nga respetuhon ang “international of the sea” sa West Philippines Sea.
Ginlakip man sang Estados Unidos ang 2016 arbitral ruling kun sa diin, nagakumpirma ini sa Philippines exclusive economic zone sa idalom sang United Nations Convention on the Law of the Sea batuk sa historical claims sang China.
