ILOILO CITY – Gin-anunsiyo sang Department of Education nga ang mga eligible employees sang ahensya ang makabaton sang ₱15,000 bilang one-time Service Recognition Incentive nga mas manubo sa gin-set nga maximum amount nga nagdangat sa ₱20,000.
Sa isa ka memorandum nga napetsahan sang Disyembre 19, ang incentives ang igapanagtag tubtob sa Enero sa masunod nga tuig kag ihatag direkta sa mga empleyado.
Suno kay Teachers’ Dignity Coalition National Chairperson Benjo Basas, mabudlay para sa mga division offices nga magpanghatag sang cash gani, ginsuhestiyon niya nga ipaagi nalang sa ila nga ATM cards.
Nahibaluan nga ginpirmahan ni President Ferdinand Marcos Jr. ang Administrative Order No. 1 nga nagapahanugot sang paghatag sang Service Recognition Incentive sa mga empleyado sa executive department sa palareho nga rate nga indi maglapaw sa ₱20,000.
Indi pa klaro kun ngaa nga ang mga empleyado sang Department of Education ang makabaton lamang sang ₱15,000.
Sang nagligad nga tuig, nagdangat lamang sa P10, 000 ang nabaton sang mga empleyado sang ahensya.
