ILOILO CITY – Ginpahayag sang Beijing nga mangin pinakauna nga world leader si President Ferdinand “Bongbong” Marcos, Jr. nga magabisita sa China subong nga tuig.
Ini ang ginkumpirma ni China’s Foreign Ministry spokesperson Wang Wenbin.
Suno pa sa iya, ini ang nagapakita lamang sang importansya sang bilateral relations sa tunga sang China kag Pilipinas.
Sa patigayunon nga visit, magasapol si Chinese President Xi Jinping kay Marcos.
Lakip man sa istoryahan amo ang mga regional kag international issues nga may interes sang duha ka pungsod.
Nahibaluan nga sa pinakauna nga State of the Nation Address ni Marcos, ginpahayag niya nga ang administrasyon ang magatindog sa kaugalingon nga independent foreign policy.
Ginpahayag man ni Marcos nga indi niya pagpasugtan ang China nga gub-on ang maritime rights sang Pilipinas nga baliskad sa panindugan ni anay presidente Rodrigo Duterte.
Nahibaluan nga padayon ang pagsakup sang China sa West Philippine Sea kag wala ginasunod ang international court ruling nga wala ini sang legal nga basehan.
Magapadulong si Marcos sa China upod kay First Lady Liza Marcos, former President Gloria Macapagal Arroyo, House Speaker Ferdinand Martin Romualdez, kag pila ka mga Cabinet secretaries.
