ILOILO CITY – Nagpaidalom sa Coronavirus disease 2019 testing si Presidente Ferdinand Marcos, Jr. upod sa katapo sang Philippine delegation kadungan sang ila pag-abot sa China kagab-i para sa tatlo ka adlaw nga state visit.
Suno sa Office of the Press Secretary, nagpaidalom si Marcos sa Reverse Transcription-Polymerase Chain Reaction test sang nag-abot sa iya hotel.
Antes magpakigkita sa mga Chinese officials bwas nga adlaw, liwat ini nga mapaidalom sa isa pa ka test.
Ang COVID tests ang kabahin sang protocol sang Chinese government bangud sang padayon nga pagsaka sang kaso sang coronavirus disease 2019 sa China.
Ginpasalig naman sang gobyerno sang China nga mangin safe si Marcos kag ang bilog nga delegasyon.
Nahibaluan nga 6:10 kagab-i, nag-abot ang Philippine delegation sa Beijing Capital International Airport.
Ang paglakat sang presidente sa China ang una niya nga bilateral visit sa isa ka non-ASEAN country.
Antes ang iya paglakat, ginpahayag ni Marcos nga tinguhaan niya nga ma-resolve ang security issues sa tunga sang China kag Philippines sa tunga sang tensions sa West Philippine Sea.
