Ginpanawagan ni Department of Interior and Local Government Secretary Benhur Abalos sa mga generals kag colonels sa Philippine National Police (PNP) nga magpasa sang ila courtesy resignation.
Ini nga tikang suno sa tiglikom ang pamaagi sang gobyerno agud mapapas ang mga police nga naangot sa illegal drug trade.
Suno kay Abalos, nagakahangawa siya bangud madamo sang mga high ranking police officers ang naangot sa illegal nga aktibidad.
“Ako ay nananawagan sa lahat ng full colonel hanggang sa general, ako ay umaapela na mag-submit ng courtesy resignation. Alam kong mabibigla kayo pero this is the only way to make a fresh start,” pahayag ni Abalos.
Ginpahayag ni Abalos nga may kapin sa 300 ka mga full colonels kag generals ang natukiban nga naangot sa illegal nga droga.
Naghingyo man ini kay Philippine National Police chief Police General Rodolfo Azurin Jr. nga buligan siya sa iya kampanya.
“Sana lang they will support this call,” dugang pa ni Abalos.
May gintukod naman nga five-member committee nga amo ang maga-review sa resignations sang mga police officers.
Nagpamalibad naman ang tiglikom nga pangalanan ang mga myembro sang komitiba, apang gin-athag nga indi siya kabahin sini.
“This is a very radical move, but we have to do this,” pahayag ni Abalos.
Kaangot sini, ginpasigurado naman ni PNP Public Information Office chief Police Colonel Redrico Maranan nga magasunod sila sa apelar ni Abalos.
“Kami po sa Pambansang Pulisya ay susunod at tatalima kung anuman po ang desisyon ng ating mga political leaders. Sapagkat alam po namin na lahat ng mga desisyon na ito ay para sa ikabubuti ng aming organisasyon at ng ating bansa” sabat ni Maranan.
