Gintawag sang miyembro sang oposisyon sa Kamara nga ang intensyon sa likod sang panawagan sa mga top police officials nga mag-resign amo ang pag-liso sa atensyon sang publiko gikan sa mga matuod-tuod nga isyu sa gobyerno.
Kasunod ini sang panawagan ni Interior Secretary Benhur Abalos sa mga generals kag full colonels sang Philippine National Police nga magpasa sang courtesy resignation bilang kabahin sang tikang sang gobyerno nga papason ang mga pulis nga involved sa baligyaanay sang iligal nga droga.
Kahapon, mismo si Philippine National Police chief General Rodolfo Azurin, Jr. ang nagpasa man sang iya nga courtesy resignation amo man ang iya bug-os nga command group.
Apisar nagpasa ini sang courtesy resignation, nagapabilin ini nga pinuno sang hanay sang kapulisan bangud maga-take effect lamang ini nga resignation pananglitan batunon kag aprubahan sang mga superiors.
Suno naman kay House Deputy Minority leader Rep.France Castro sang ACT Teachers party-lost, isa ka distraction ini nga panawagan.
Nagapati ang mamalidha nga ginatuyo sini nga i-divert ang atensyon sang publiko gikan sa kontrobersyal nga mga isyu kaangay sang technical glitch nga natabo sa Ninoy Aquino International Airport sang Enero 1, mas nagtaas nga presyo sang balaklon kag serbisyo sa Bag-ong tuig, kag pagsaka sang presyo sang tubig nga ginpatuman sang Maynilad kag Manila Water.
Suno kay Castro, kun desidido ang Marcos, Jr. administration nga matinluan ang hanay sang kapulisan, kuntani i-file ang kaso batok sa involved nga mga pulis.
Ginpahayag man sini nga dapat nga pahanugutan sang gobyerno ang International Criminal Court agud nga ma-imbestigaran ang pagpang-abuso sa operasyon sang mga pulis. ##
