Para kay Justice Secretary Jesus Crispin Remulla, “justice is served” matapos gin-acquit sang Las Piñas court ang iya anak sa kaso nga illegal drug possession.
Oktubre sang nagligad nga tuig sang gindakop ang anak sang tiglikom nga si Juanito Jose Remulla III matapos nagbaton ini sang package nga nagaunod sang 900 grams sang high-grade marijuana nga nagabalor sang P1.3 million.
Apang sa desisyon sang korte, gin-cite ang lapses sang anti-drug agents sa chain of custody kag ginpahayag nga wala sang bastante nga ebidensya nga nakahibalo ang anak nga Remulla nga may unod nga narcotics ang ginbaton niya nga parcel.
Suno naman sa amay nga remulla nga secretary subong sang Department of Justice, “relieved and happy” siya sang nabatian ang desisyon sang korte.
Kinamatarong sang iya anak suno kay Remulla nga i-presume nga inosente samtang wala pa napamatud-an ang kaso.
Ginsulit man sini ang iya una nga statement nga indi siya magpahilabot sa dalagan sang kaso. Ginpahayag man niya nga may salig siya sa proseso.
May yara pa sang separado nga panumbungon nga gina-atubang ang anak nga Remulla bangud sa importation sang illegal drugs kag paglapas sa Customs Modernization and Tariff Act nga pending pa sa Pasay City Prosecutor’s Office.
Wala na sang iban pa nga korte nga nag-isyu sang warrant of arrest batok sa iya.
Ginpakamalaot naman sang mga lider sang progressive groups ini nga desisyon sang korte.
Lakip diri sanday Renato Reyes sang Bagong Alyansang Makabayan kag Carlos Zarate sang Bayan Muna nga nagpahayag nga tuman ka dasig ang trial kay Juanito nga amo man kuntani ang ginahatag sa pigado kag ordinaryo nga mga tawo.
“Sana all other long pending cases are as expeditiously decided like that of the young Remulla. While poor families or victims of trumped up charges languish in jail for years, even decades, the young Remulla’s case is not even three months old,” pahayag ni Zarate.
