ILOILO CITY – Nagsaka pa sa 307 ang na-record nga fireworks-related injuries sa pungsod suno sa Department of Health humalin sang Disyembre 21, 2022 tubtob Enero 6, 2023.
Suno sa ahensya, 16 ka mga bag-o nga firecracker blast injuries ang na-record sa Department of Health sentinel hospitals humalin sang Enero 5 tubtob 6.
Ang pinakaulihi nga figure ang mas mataas sang 62 percent kun ipa-anggid sa gin-report sa amo man nga period sang naligad nga tuig.
Sang December 21, 2020 tubtob January 6, 2021, nagdangat sa 189 ang na-record nga fireworks-related injuries.
Sa latest surveillance report, ang Metro Manila sa gihapon ang may pinakamadamo nga numero sang fireworks-related injuries nga may 139 ka mga kaso.
Ikaduha ang Western Visayas nga may 37; Ilocos Region nga may 33; Central Luzon nga may 24; kag Calabarzon nga may 18.
Kalabanan sa mga biktima ang lalaki nga may 245 nga naga-edad isa tubtob 80 ka tuig.
Ang kalabanan sang gingamit nga palupok amo ang kwitis, boga, 5-star kag fountain.
Wala naman sang may napatay bangud sa palupok.
