ILOILO CITY – Nagpanaog sa pwesto si Department of National Defense officer-in-charge Jose Faustino Jr suno sa Malacañang subong nga adlaw.
Ang resignation ni Faustino ang natabo matapos ang pagbaylo sang liderato sa Armed Forces of the Philippines kun sa diin, ginbuslan ni General Andres Centino si Lieutenant General Bartolome Bacarro bilang chief of staff.
Sa Facebook post ni Presidential Communications Office officer-in-charge Cheloy Garafil, ginbaton ni President Ferdinand Marcos Jr. ang resignation ni Faustino.
Sa subong, wala sa gihapon ginpahayag sang palasyo sang rason sang resignation sang anay opisyal.
Si Faustino nga anay chief of staff sang Armed Forces of the Philippines ang gin-appoint ni Marcos bilang officer-in-charge sang Hulyo sang ini ang nagpungko bilang presidente.
Una na nga ginpasalig ni Faustino ang “smooth implementation” sang modernization program sang militar.
Nahibaluan nga naangot sang publiko ang naglupok nga alegasyon sa destabilization plot sa militar sa pag-absent ni Faustino sa change of command ceremony sang Armed Forces of the Philippines kun sa diin ginbalik bilang chief of staff si Centino.
Sa amo nga event, ginalauman kuntani ang head sang Department of National Defense, apang wala sang Faustino nga nag-abot kag ang nagatiglawas lamang sang ahensya amo sanday undersecretaries Franco Nemesio Gacal kag Ignacio Madriaga.
Samtang, kadungan sang resignation ni Faustino, ginhingadlan bilang bag-o nga tiglikom sang Department of National Defense si Presidential Adviser on Peace, Reconciliation, and Unity Secretary Carlito Galvez Jr.
Si Galvez ang nagserbe bilang pinuno sang Armed Forces of the Philippines sa idalom sang Duterte administration.
Siya man ang nagserbe bilang commanding general sang Western Mindanao Command kun sa diin, dako ang nangin bahin niya sa lima ka bulan nga Marawi siege sang 2017.
Bangud sini, nakabaton sang Order of Lapu-Lapu (Kamagi Medal) bangud sang iya “outstanding performance” sang amo nga tion.
Si Galvez ang isa ka peace advocate nga nagserbe man anay bilang chairman sang Coordinating Committee on the Cessation of Hostilities para sa government side sa peace process upod sa Moro Islamic Liberation Front.
Siya ang isa ka battle-seasoned general, kag eksperyensyado sa combat and intelligence operations, leadership development, counter-terrorism, humanitarian assistance, strategic management, systems dynamics modeling, kag peace-building, negotiation and mediation.
Kadungan sang COVID-19 pandemic, si Galvez ang nagserbe bilang vaccine czar kag “chief implementer” sang national policy sang gobyerno batuk sa amo nga balatian.
