ILOILO CITY – Nagpanindugan ang palasyo sang Malacañang nga nahibaluan ni anay Department of National Defense officer-in-charge Jose Faustino Jr. ang hinali nga pagbag-o sang liderato sa Armed Forces of the Philippines.
Ini ang kasunod sang ginpagwa nga statement ni Faustino kun sa diin, ginpahayag niya nga nagpanaog siya sa pwesto sang nagligad nga semana matapos nahibaluan lamang sa balita nga may yara sang bag-o nga military chief nga nagsumpa sa Malacañang.
Ginklaro ni Presidential Communications Office Secretary Cheloy Garafil nga si President Ferdinand “Bongbong” Marcos Jr. lamang ang may prerogative sa pag-appoint sang pinuno sang militar.
Dugang pa niya, ginpahayag ni Executive Secretary Lucas Bersamin nga nahibaluan ni Faustino ang mga developments sa appointment ni General Andres Centino nga amo ang naga-isahanon nga 4-star general sa Armed Forces of the Philippines.
Una na nga ginpahayag ni Faustino nga indi niya mapasugtan nga maguba kag mapulitika ang reputasyon sang Armed Forces of the Philippines bangud nga ginpromisa niya nga ipabilin ang organisasyon sang militar sa high esteem.
Ini ang wala na niya ginpaathag pa.
Gin-appoint ni Marcos si Centino bilang pinuno sang Armed Forces of the Philippines tal-os sa anay appointee nga si Lieutenant General Bartolome Bacarro nga nagserbe lamang sa ginabanta lima ka bulan.
Samtang, gin-appoint naman ni Marcos si Presidential Adviser on Peace, Reconciliation, and Unity Carlito Galvez Jr. bilang tiglikom sang Department of National Defense nga amo ang nagbulos kay Faustino.
Kasunod sang resignation ni Faustino, ginkumpirma ni spokesperson Arsenio Andolong nga pito tubtob siyam ka mga opisyal sang Department of National Defense ang nagpanaog sa pwesto.
Suno kay Andolong, ang resignation sang mga Defense officials sa idalom sang bag-o nga liderato ang “normal” lang bangud ini ang “customary” kag kabahin sang procedure para sa mga coterminous officials.
Magluwas kay Faustino, ginpahayag ni Andolong nga pila ka ka mga officials nga nag-resign ang nagalakip sang kapin lima ka undersecretaries kag apat ka assistant secretaries.
Dugang niya, maka-function gihapon kag makapadayon sang operasyon ang Department of National Defense sa pihak sang madamo nga resignations.
