ILOILO CITY – Nagmandu si President Ferdinand Marcos, Jr. nga padayunon ang pagpagwa sa mga persons deprived of liberty nga kwalipikado para sa paroles kun sa diin, ang iban sa ila ang nagakinahanglan sang legal nga bulig.
Sa isa ka statement, ginpahayag sang Presidential Communications Office nga ini ang makabulig agud nga indi na maggutok ang mga presuhan sa pungsod.
Suno sa presidente, ang mga persons deprived of liberty ang wala sang maayo nga abugado gani, buligan sila sang gobyerno pinaagi sa pagpagwa sa ila.
Agud nga ma-decongest ang mga presuhan, suportado sang presidente ang pagpahamtang sa mga “hardened criminals” sa isa ka separado nga pasilidad agud nga ang iligal nga mga aktibidad ang mapunggan.
Aminado man ang presidente nga may yara sang lapnagon nga kurapsiyon sa Bureau of Corrections.
Base sa report nagikan sa Department of Justice, ginpahayag sang Malacañang nga may yara sang halos 3,000 nga mga preso ang ginpaggwa humalin sang Hulyo tubtob sang Disyembre.
Ginaduso man ang pagpatukod sang pasilidad sa Luzon, Visayas, kag Mindanao para sa mga nagkomiter sang heinous crimes.
Ang Republic Act No. 11928 nga nangin layi sang Hulyo 30 sang nagligad nga tuig ang magatukod sang secured kag state-of-the-art facilities para sa mga convicts sa Luzon, Visayas, kag Mindanao.
Ini nga mga facilities ang pahamtangan sang surveillance cameras 24/7.
Ang mga lock, pwertahan kag palibot sang pasilidad ang butangan sang “enhanced and extensive” security features suno pa sa nasambit nga layi.
Lakip sa mga ginapanan-aw nga sayluhon sa bag-o nga heinous crime facilities amo ang indi magnubo sa 17,490 convicts nga yara subong na-detain sa maximum security compound sang New Bilibid Prisons suno sa Bureau of Corrections.
