ILOILO CITY – Magapadulong na subong nga adlaw, Enero 15 si Presidente Ferdinand Marcos, Jr. sa Davos, Switzerland agud nga magtambong sang 2023 World Economic Forum nga magalawig tubtob sa Enero 20.
Sa amo nga forum, ginalauman nga maduso ni Marcos ang economic agenda sang pungsod.
Ang pagpadulong ni Marcos sa Europe ang ikaduha na niya nga travel subong nga bulan pagkatapos sang state visit sa China.
Suno kay Palace Press Briefer Daphne Oseña-Paez, ang World Economic Forum ang isa ka maayo nga uportunidad para sa Pilipinas agud nga ma-explore ang bag-o ang investment, trade, kag infrastructure systems kadungan sang pagsarurot sang ekonomiya.
Ini man ang magahatag sang opurtunidad sa presidente nga iduso ang mga prayoridad sang pungsod kaangay sa food, energy, security, digitalization, climate action, attracting investments, kag pag-promote sang beneficial trade, kag iban pa.
Ini man ang makahatag sang tsansa sa Pilipinas nga mag-partner upod sa iban nga pungsod, negosyo, civil society, kag iban pa nga stakeholders kag mag-collaborate sa World Economic Forum kag sa ila mga inisyatibo.
Sa lima ka adlaw nga event, natalana nga i-presentar ni Marcos ang Maharlika Wealth Fund sa kaangay niya nga mga lideres.
Ang Maharlika Wealth Fund amo ang sovereign wealth fund nga gamiton sang gobyerno agud nga mag-invest sa isa ka masangkad nga outlet kaangay sang foreign currencies, fixed-income instruments, domestic kag foreign corporate bonds, commercial real estate, kag infrastructure projects.
Magluwas sa World Economic Forum, natalana nga magpakigkita si Marcos sa mga business leaders kag members sang Filipino community.
Apang bangud sang tight schedule, mahimo nga indi na makapatigayon sang bilateral meeting si Marcos sa iban pa nga mga world leaders.
Suno sa Department of Foreign Affairs, si Marcos lamang ang naga-isahanon nga lider nagikan sa Association of Southeast Asian Nations kag isa sa duha ka mga lider nagikan sa Asya nga magapasakop sa forum.
