Jaro, Iloilo City – Gin-agda sang Archdiocese of Jaro ang publiko nga mahimo magsimba umpisa subong nga adlaw para sa Novenario Masses kag preparasyon para sa fiesta ni Nuestra Señora dela Candelaria sa Pebrero 2.
Sa interview sang Bombo Radyo kay Rev. Fr. Angelo Colada, Director sang Social Communication sang Archdiocese of Jaro, iya ginpahayag nga bukas ang simbahan sa mga deboto nga luyag magsimba kasubong sang preparasyon para sa pista sang patrona Jaro kag Western Visayas nga si Nuestra Señora dela Candelaria.
Suno kay Fr. Colada, maga-umpisa ang Novenario Masses las 5:30 sa hapon subong nga adlaw tubtub sa Pebrero 1.
Ginpahayag man sang natungdan nga magapatigayon man ang simbahan sang Solemn Foot Procession sa Pebrero 2 kag dapat nga makig-angot lang sa simbahan agud indi magdinugok.
Pangunahan naman ni Jaro Archbishop Rev. Jose Romeo Lazo ang koronasyon kay Candelaria sa Pebrero 2.
Ang tema subong nga tuig amo ang, “We pray through Nuestra Señora de la Candelaria to enlarge our heart with the light of Jesus”.
Samtang, indi naman mangin istrikto ang simbahan sa social distancing, apang nagakadapat nga paga-obserbahan gihapon ang health protocols kaangay ang pagsuksok sang face mask kag pagdala sang sanitizer.
