ILOILO CITY – Nagmandu si President Ferdinand Marcos, Jr. sa Department of Agriculture nga imbestigaran ang pagsaka sang presyo sang itlog apisar nga bastante man ang suplay sini sa pungsod.
Ginmanduan ni Marcos si Agriculture Senior Undersecretary Domingo Panganiban nga magpakigkita sa traders kag poultry farmers agud nga mapaathag ang “wide gap” sa farm gate kag retail price sang itlog.
Suno sa Presidente, ang pagsaka sang presyo sang itlog ang wala nagasanto sa pagsaka sang production cost.
Dugang pa niya, pangitaan sang paagi sang gobyerno nga ma-kontrol ang pagsaka sini bangud nga indi mapaathag ang halos katunga sang profit margin nga nakita.
Base sa monitoring sang Department of Agriculture, ang retail price sang medium-sized eggs ang nagdangat sa P9 as of January 13 nga mas mataas sa P6.90 nga una nga na-report sang Disyembre sang nagligad nga tuig.
Ang mataas nga presyo sang itlog ang magaresulta man sa pagsaka sang presyo sang cake kag iban pa nga pastries suno sa isa ka bakers group.
