ILOILO CITY – Ginpagwa sang Department of Budget and Management ang mga priority legislative reforms agenda nga iduso sang Marcos administration kadungan sang pagbalik na sang session sang Kongreso.
Suno sa ahensya, lakip sa mga legislative reforms sang administrasyon amo ang Progressive Budgeting for Better and Modernized, Governance Bill, Budget and Treasury Management System, National Government Rightsizing Program, kag Maharlika Investment Fund.
Pahayag ni Budget Secretary Amenah Pangandaman, ang mga legislative reforms ang importante agud nga ma-promote ang transparency, efficiency kag responsiveness sa public service.
Ang Progressive Budgeting for Better and Modernized Governance Bill ang nagatuyo nga ma-institutionalize ang Cash Budgeting System kag iban pa nga public financial management agud nga mapasiguro ang timely implementation sang mga programa kag mga proyekto.
Samtang, ang Budget and Treasury Management System ang isa ka key digitalization measure nga nagatuyo nga mapabaskog pa ang Government Integrated Financial Management Information System.
Bilang central database, ang ini nga system ang magapatuman sang real-time mapping sang transactions nagikan sa pagbakal tubtob sa pagbayad.
Ang National Government Rightsizing Program naman ang maga-upgrade sang institutional capacity sang gobyerno agud nga ma-perform ang mandato sini nga makahatag sang maayo nga serbisyo samtang ginapasiguro ang optimal kag efficient use sang resources.
Kag ang Maharlika Investment Fund bill ang nakita nga isa ka mapag-on nga instrumento sa pag-promote sang economic growth kag advance social development.
