ILOILO CITY – Walo ang patay lakip na ang anum ka mga Chinese nationals matapos nga naglugdang ang isa ka barko sa kadagatan sang Japan.
Ini ang ginkumpirmar sang isa ka Chinese diplomat.
Suno kay Bombo Josel Palma direkta sa Japan, ang barko nga Jin Tian nga may karga nga crew nagikan sa China kag Myanmar ang nagpadala sang distress signal nagikan sa 110 kilometers west sang Danjo Islands sa southwestern Japan.
Ang kapitan sang barko ang naggamit sang satellite phone agud nga mapahibalo ang South Korean coast guard nga bayaan nila ang nagakalugdang nga barko base sa pahayag sang Jeju coast guard.
Madamo sang vessel kag aircraft sang coast guard sang Japan kag sang militar ang nagpatigayon sang search ang rescue operation kun sa diin 13 ka mga crew members ang na-retrieve.
Tatlo ka mga pribado nga barko sa lugar ang nagbulig man agud nga pangkuha-on ang lima ka mga stranded nga crew members.
Suno naman sa Consul General sang China sa syudad sang Fukuoka, Lu Guijun, 13 ka mga tawo ang nakita, walo diri ang kumpirmado nga patay kun sa diin, anum ang Chinese.
Samtang, lima ka mga crew members lakip ang apat ka mga Chinese ang yara na sa hilway nga kahimtangan.
Indi pa makumpirmar sang Japanese authorities ang figure nga ginhatag sang Chinese diplomat.
Suno pa kay Palma, base sa data sang Japanese authorities, siyam ang nagapabilin nga missing kag sa 13 nga na-retrieve, duha ang patay.
Ang 6,651-tonne nga Jin Tian ang rehistrado sa Hong Kong suno sa coast guard sang Japan.
Kun matandaan, sang 2020, isa man ka cargo ship nga may sakay nga 43 ka mga crew kag 6,000 ka mga baka ang nagkapan sa southwestern Japan bangud sang bagyo.
Duha ka mga crew ang nakaluwas sang amo nga tion.
