ILOILO CITY – Nagmandu na ang Department of Migrant Workers nga balikan ang bilateral labor agreement sa tunga sang Pilipinas kag Kuwait kasunod sang kamatayon sang overseas Filipino worker nga si Jullebee Ranara.
Ini ang suno kay Undersecretary Hans Leo Cacdac.
Ang 35 anyos nga si Ranara ang ginapahayag nga ginhimuslan sang 17 anyos nga anak sang iya employer kag ginbilin ang lawas sa isa ka disyerto sa Kuwait.
Suno sa ahensya, magadihon sila sang mga recruitment process kag standards agud nga mahatagan sang proteksyon ang mga overseas Filipino workers.
Halimbawa sini amo nga ang mga agencies nga may matinlo nga track records lamang ang pahanugutan nga maka-deploy sang overseas Filipino workers sa Kuwait.
Ginpahayag ni Cacdac nga ang bilateral agreement nga napirmahan sang 2018 kag nag-expire sang Mayo 2022 ang automatic nga gin-renew bangud sang automatic renewal clause.
Apang suno sa iya, nagpasalig man ang gobyerno sang Kuwait nga hatagan sang hustisya ang kamatayon ni Ranara.
Ginpahayag man sang natungdan nga ginatrabaho na sang ila ahensya ang paghatag sang bulig sa pamilya ni Ranara.
Sang Byerne, nag-abot na ang bangkay ni Ranara sa Manila.
Nagsugod naman ang autopsy examination sang National Bureau of Investigation sa bangkay sang biktima base man sa hingyo sang pamilya.
Nagpagwa naman sang preventive suspension order ang Department of Migrant Workers sa employer sang biktima.
Suno kay Cacdac, may yara sang 268,000 ka mga Pilipino sa Kuwait kun sa diin, 195,000 ang domestic workers.
Sang Enero 2022, gin-aprubahan sang Pilipinas ang total deployment ban sa Kuwait kasunod sang kamatayon sangFilipina migrant worker nga si Jeanelyn Villavende.
Ini ang gin-lift sang February 2020.
