ILOILO CITY – Ginpahayag sang Philippine Air Force nga kinahanglan na ang modern replacement sang mga eroplano kasunod sang pagtibusok sang isa ka military plane sang nagligad nga semana.
Suno kay spokesperson Colonel Ma. Consuelo Castillo, ang mga eroplano sang pungsod ang madugay na lakip na ang SF260TP Marchetti plane nga nagtibusok sa talamnan sa Pilar, Bataan nga ginkamatay sang pilot kag isa pa ka aviator.
Ang ini nga Italian light aircraft ang ginagamit na sang Pilipinas humalin sang 1992.
Ang attack aircraft ang nangin epektibo sa internal security operations kag counter-terrorism efforts ilabi na sa Marawi siege suno kay Castillo.
Apang ginpasalig ni Castillo nga ang tanan nga eroplano sang Philippine Air Force ang well-maintained kag yara sa maayo nga kondisyon.
Sa subong, padayon pa ang imbestigasyon kag ginahibalo kun ngaa nga nagtibusok ang eroplano.
Ginalantaw ang tanan nga anggulo humalin sa material padulong sa human kag weather factors.
Ang apat ka iban pa nga SF260TP aircraft ang grounded bilang kabahin sang standard operation procedure samtang nga ginapatigayon ang imbestigasyon.
Apisar sini, mahimo sa gihapon nga maka-deliver sang air support ang Philippine Air Force.
