ILOILO CITY – Nadiskubrehan sang isa ka forensic pathologist nga mas madamo pa nga death certificates ang ginpeke sa drug war ni anay President Rodrigo Duterte.
Ginpaidalom sa laboratory examination ni Dr. Raquel Fortun ang bangkay sang 74 ka mga napatay sa drug war sang nagligad nga administrasyon.
Suno sa iya, sang nagligad nga Abril 2022, may yara sang pito nga mga death certificates nga ginpeke kag gindugangan pa sang apat.
Suno sa iya, 11 sa 74 ka mga kaso ang napatay bangud sa pagtiro sang armas apang ginpagwa sa death certificate nga natural ang kamatayon.
Ang liwat nga pagpaidalom sa laboratory examination sa bangkay sang madamo pa nga napatay bangud sa drug war ang kasunod sang pagkadiskubre ni Fortun nga indi insakto ang resulta sang examination sa lawas sang 17 anyos nga si Kian Delos Santos nga ginpatay sang pulis sa gina-alegar anti-drug operation sang Agosto 2017.
Nadiskubrehan niya nga ang lawas ang wala nabuksan nga baliskad sa normal nga ginahimo sa tion sang autopsy.
Ang iban pa nga autopsy procedures nga nakita ni Fortun nga makaduluda amo ang arbitrary insertion sang metal stick sa pilas kag ang sala nga takus sang trajectory sang bala.
May nakita man ini nga bullet fragment sa neck vertebrae area ni Delos Santos nga posible nalipatan sang mga otoridad.
Sa amo nga kaso, tatlo ka mga pulis sang 2018 ang nasentensyahan nga guilty bangud sa pagpatay sa pamatan-on.
Nahibaluan nga masobra sa 6, 200 ka mga tawo ang napatay bangud sa anti-drug campaign ni Duterte base sa official figures sang otoridad.
Apang suno sa mga rights groups, posible nga mas madamo pa sa amo nga numero ang aktwal nga figure.
Una na nga ginpahayag ni President Ferdinand Marcos Jr., nga padayunon niya ang drug war apang maga-focus sa prevention kag rehabilitation.
