ILOILO CITY – Ginsaksihan nanday President Ferdinand R. Marcos Jr. kag Japanese Prime Minister Fumio Kishida ang pagbayluhanay sang key agreements sa tunga sang duha ka pungsod sa ginpatigayon nga pinakauna nga bilateral meeting sang duha ka lider sa Prime Minister’s Office sa Tokyo, Japan.
Suno kay Bombo Josel Palma direkta sa Japan, pito ka mga agreements ang ginpirmahan nga naga-cover sang nagkalain-lain nga mutual cooperation lakip na ang humanitarian assistance, disaster relief, infrastructure, agriculture, kag digital cooperation.
Ini ang ginalakipan sang mga masunod:
Exchange of Notes on Japanese Official Development Project: North-South Commuter Railway Extension Project (II);
Exchange of Notes on Japanese Official Development Project: NSCR – Malolos to Tutuban Project (II);
Loan Agreement para sa North-South Commuter Railway Extension Project (II);
Loan Agreement para sa North-South Commuter Railway- Malolos to Tutuban Project (II);
Umbrella Term of Reference on Humanitarian Assistance and Disaster Relief Cooperation;
Memorandum of Cooperation sa tunga sang Department of Agriculture kag Ministry of Agriculture, Forestry and Fisheries on Agriculture Cooperation; kag
Memorandum of Cooperation sa patag sang Information and Communications Technology.
Suno naman kay Finance Secretary Benjamin Diokno, ang loan para sa North-South Commuter Railway Extension Project ang nagdangat sa ¥400 billion ukon masobra sa P166 billion.
Ang ini nga proyekto ang ginalauman nga makapataas sang economic activity sa tatlo ka mga rehiyon kag makaganyat sang mas madamo nga foreign investors.
Ini ang ginapanan-aw nga magapabaskog pa sang economic recovery sang pungsod nagikan sa epekto sang Coronavirus Disease 2019 kag maka-generate sang masobra sa 35,500 nga mga trabaho sa tion sang construction kag masobra sa 3,200 nga mga permanente nga trabaho sa tion nga maga-operate na ini.
