ILOILO CITY – Nagdangat sa $10 billion ukon P500 billion tubtob P550 billion ang balor sang natipon nga investment commitments sa official visit ni President Ferdinand Marcos Jr. sa Japan.
Ini ang suno kay Trade Undersecretary Ceferino Rodolfo.
Ang Philippine delegation sa Tokyo ang nakakuha sang 35 ka mga investment pledges sa infrastructure, energy, manufacturing, healthcare, telecommunications, kag iban pa.
Nahibaluan nga si Marcos ang yara subong sa Japan para sa lima ka adlaw nga official visit nga nagsugod sang Pebrero 8 kag magatakup subong nga adlaw, Pebrero 12.
Una na nga ginpahayag sang presidente nga ang epekto sang deals kag agreements nagikan sa Japan ang madali na gid lamang nga mabatyagan sang mga Pilipino.
Suno naman kay Rodolfo, sa tion nga makita sang mga Japanese companies nga may dako nga opurtunidad sa pungsod, magarehistro sila sa Board of Investments, sa Philippine Economic Zone Authority, Clark Development Corp., kag sa Authority of the Freeport Area of Bataan.
Ginpahayag man sang opisyal nga ang investment target para sa Board of Investments subong nga tuig ang nagdangat sa P1 trillion nagikan sa P729 billion sang nagligad nga tuig.
Dugang pa niya, nagdangat na sa P414 billion ang narehistro sa una nga bulan sang 2023.
Buot silingon, ini ang nagsobra na sa 40% sang P1 trillion nga target.
Magapakigkita naman subong nga adlaw si Presidente Ferdinand Marcos, Jr. sa Filipino community sa Japan.
Suno kay Josel Palma direkta sa Japan, sa wala ginsapubliko nga venue, 1, 350 lamang ang mga Pilipino nga ma-accommodate kag 25 lamang ka mga marshals ang iga-deploy.
Ang venue ang wala ginsapubliko agud nga malikawan ang pagdugok sang mga tawo.
Nagalaum naman ang mga overseas Filipino workers nga makapatukod sang temporary shelter ang gobyerno sang Pilipinas para sa mga distressed migrants.
