ILOILO CITY – Nagpasalamat si President Ferdinand Marcos, Jr. sa Filipino community sa Japan bangud nangin maayo nga mga ambassadors of goodwill ang mga ini.
Suno kay Bombo Josel Palma direkta sa Japan, wala sila nabudlayan sa pagpangaluyag sa mga Japanese investors bangud nga ginpakita sang skilled Filipino workers ang ila kapisan kag katampad sa trabaho.
Ini nga mga kina-iya ang nauyunan sang mga negosyante sa Japan gani, handa gid sila nga mag-invest sa Pilipinas.
Bangud sini suno sa presidente, mas madamo na nga trabaho ang mahatag sang gobyerno diri sa pungsod.
Samtang, nagpasalig man ang presidente nga nga panami-on ang mga airports sa Manila, Cebu, kag Davao agud nga makaganyat sang madamo pa nga turista.
Katuyua-an man sini nga mapadali ang byahe sang mga bisita.
Dugang pa ni Palma, gin-introduce sang Department of Tourism sa mga lider sang grupo sang mga Pinoy sa Japan ang Bisita Be My Guest program nga una na nga ginlunsyar diri sa pungsod.
Ang ini nga programa ang magahatag sang incentive sa mga Filipino nga maga-imbitar sa foreign tourists kag may travel discounts kag tsansa nga magdaog sang condominium kag libre nga vacation trips.
