Iloilo – Ginaduso sang Sangguniang Panlalawigan ang pag-amyendar sang Provincial Revenue Code agud ilakip ang cockpit ukon ang pagbulang sa pagasukton sang buhis.
Sa interview sang Bombo Radyo kay Ex-Officio Board Member Ramon Sullano sang Philippine Councilors League-Iloilo kag Committee Chairperson on Games and Amusement, iya ginpahayag nga nakalab-ot sa iya igtalupangod ang nangin kahimtangan sang cockpit sa probinsya kun sa diin wala ini nalakip sa ordinansa nga nagakadapat buhisan.
Suno kay Sullano, yara na sila karon sa pag-finalize sang ordinansa agud ilakip ang cockpit.
Ginapahayag sang natungdan nga ginalauman nga makatipon sang masobra sa P5 million sa kada tuig ang probinsya nagikan sa amusement tax sa nasambit nga pahampang.
Samtang, nagapati si Sullano nga nagakinahanglan nga gilayon ipasar ang ammendment agud may yara sang talaksan sa pagpanukot sang buhis kun sa diin may yara sang parte ang probinsya kag mga Local Government Units base sa nakolekta.
Nahibaluan nga italana ang public hearing angot sa ginaduso nga amendment sa Provincial Revenue Code sa Marso 8-13, 2023.
