ILOILO CITY – Ginpahayag sang militar sang South Korea nga naglunsyar sang suspected long-range ballistic missile ang North Korea.
Ini ang pinakauna nga paglunsyar sang missile sang Pyongyang sa sulod sang pito ka semana, pila ka adlaw antes ang pagsugod sang joint tabletop exercises sang Seoul kag Washinton.
Suno sa militar sang South Korea, na-detect ang paglunsyar sang isa ka long-range ballistic missile sa East Sea nagikan sa Sunan area sang Pyongyang ukon ang Sea of Japan.
Ginkumpirmar man sang Japan ang amo nga impormasyon kun sa diin, ginpahayag sang coastguard nga nagtupa na ang suspected missile apang wala na gindetalye kun sa diin.
Suno sa vice defence minister sang Japan nga si Toshiro Ino, posible nga nagtupa ini sa Sea of Japan sa sulod sang exclusive economic zone sang pungsod nga yara sa kalayuon nga 200 km west sang Oshima, Hokkaido.
Bangud sini, ginpabaskog pa sang Seoul ang joint military drills kag cooperation sa key security ally nga Washington.
Una na nagpamahog ang North Korea nga may matabo sa tion nga magapadayon ang US-South Korea drills nga ginakabig na nga pagpahanda para sa isa ka inaway.
