ILOILO CITY – Ginklaro sang Malacañang nga ang Pebrero 25, 2023 nga amo ang ika-37 nga anibersaryo sang EDSA People Power Revolution, ang isa ka regular working day.
Sa official statement sang Official Gazette, ang Pebrero 25 ang isa na ka regular working day matapos nga gindeklarar nga special non-working day ang Pebrero 24 agud nga magmarka sang anibersaryo sang EDSA.
Ini agud nga ma-obserbar ang holiday economics base sa Proclamation No. 90 nga napetsahan sang Nobyembre 11, 2022.
Una na nga ginpahayag ni Marcos nga ang pagpatemprano sang holiday ang may katuyu-an nga ma-avail sang mga Filipino ang benepisyo sang mas malawig nga weekends bilang pagsunod sa principle sang holiday economics.
Santo sa Proclamation No. 167 nga ginpirmahan kahapon, ang pagselebrar sang EDSA People Power Revolution Anniversary ang ginsaylo man sa Pebrero 24 nagikan Pebrero 25, ang historical significance sang EDSA People Power Revolution ang magapadayon.
Nahibaluan nga ang makasaysayan nga 1986 revolution ang nagpalayas kay anay Presidente Ferdinand Edralin Marcos, Sr. nga amo ang amay sang subong presidente.
