ILOILO CITY – Nagpanindugan si Justice Secretary Crispin Remulla nga magapatigayon sang kaugalingon nga imbestigasyon ang Pilipinas sa madugu-on nga drug war sa idalom sang Duterte administration kun sa diin, linibo ang mga napatay.
Ini ang sabat ni Remulla sa pahayag sang European Parliament Subcommittee on Human Rights nga ang prosecution sa mga responsable sa likod sang mga pagpamatay sa war on drugs ang madugayan pa kun basehan ang kadasigon sang imbestigasyon sa subong.
Nahibaluan nga ginpahayag ni Hannah Neumann, vice-chairperson sang subcommittee nga ang suporta sang International Criminal Court ang makapasiguro nga ang anum ka libo nga kaso sang pagpamatay ang ma-imbestigaran sang maayo.
Ginpahayag dugang ni Neumann ang pag-intra sang international court ang makabulig sa pamilya sang mga biktima kag sa mga witnesses agud nga maka-angkon sang pagsalig nga wala sang harassment kag intimidation nagikan sa pareho nga mga tawo nga amo ang nagpatay sa ila mahal sa kabuhi.
Sang nagligad nga Enero, ginpasugtan sang the Hague- based court ang pagbalik sang imbestigasyon sa war on drugs sa idalom sang Duterte administration.
Una na nga nagpahayag ang Pilipinas nga indi ini mag-cooperate sa imbestigasyon bangud sa isyu sang jurisdiction.
