ILOILO CITY – Gin-relieve ang tanan nga personnel sang Bayawan City Police Station sa Negros Oriental kag ginsaylo sa Negros Oriental Police Provincial Office headquarters sa banwa sang Sibulan samtang nga nagapadayon ang paglagas sa mga nabilin nga suspek sa kamatayon ni Governor Roel Degamo kag sa walo ka iban pa.
Sila ang gin-islan sang Police Regional Office 7 sang mga personnel nagikan sa nagkalain-lain nga police stations sa probinsya.
Suno kay Police Lieutenant Colonel Gerard Ace Pelare, spokesperson sang Special Investigation Task Group Degamo, ang replacement team ang maga-take over sang mga trabaho sang gin-relieve nga mga personnel.
Wala na ginbuyagyag ni Pelare kun pila ang mga personnel nga gin-relieve bangud sang security reasons.
Ginpaathag niya nga ang nasambit nga tikang ang makabig nga operational kag tactical decision.
Samtang, nagapati ang opisyal nga ang mga wala nadakpan nga mga suspek ang nagpalagyo sa kabukiran sang probinsya.
Suno pa kay Pelare, ginpabaskog pa nila ang police kag military presence sa Negros Oriental agud nga mapabilin ang kalinong kag katawhay.
Suno sa mga nagaguluwa nga impormasyon, ang mga personnel sa iban pa nga police station sa probinsya ang iga-relieve man sa masunod nga mga inadlaw.
Kung madumduman, si Governor Degamo upod sa walo ka iban pa ang gin-assassinate sa sulod sang iya balay sa banwa sang Pamplona sang nagligad nga Sabado, Marso 4.
