ILOILO CITY – Maga-host sang isa ka state visit si United States President Joe Biden para kay South Korean President Yoon Suk Yeol sa Abril 26.
Ini ang gin-anunsyo sang White House kadungan sang pagpabaskog pa sang kooperasyon batuk sa pamahog nagikan sa North Korea.
Ang Estados Unidos kag ang South Korea ang nagapatigayon na sang madamo nga joint drills bangud sang nagadako nga pamahog nagikan sa nuclear-armed Pyongyang, nga nagpatuman na sang sunud-sunod nga banned weapons tests sang nagliligad nga mga binulan.
Ang prestihiyoso nga state visit ang maga-highlight sang importansya sang alyansa sa tunga sang duha ka mga pungsod suno sa White House.
Ini ang maga-selebrar man sang ika-70 nga anibersaryo sang bilateral ties nga suno sa White House, critical para sa kalinong, stability kag prosperity para sa duha ka mga pungsod, sa Indo-Pacific kag sa bilog nga kalibutan.
Ang state visit ang magalakip sang state dinner sa presidential mansion sa Washington.
