ILOILO CITY- Nagpatuman na sang ‘blended learning’ ang mga eskwelahan sa Iloilo City bangud sa tuman ka masingkal nga init.
Sa interview sang Bombo Radyo Iloilo kay Alexis Rivas, Principal IV sang Jalandoni Memorial Elementary School, iya ginpahayag nga masobra na sa 80 ka mga estudyante sa ila ila buluthuan ang nalipong ukon nakaeksperyensiya sang paglingin sang ulo kag pagkasunggo samtang yara sa hulot- klasehan.
Suno kay Rivas, mangin ang ila nga mga manunudlo kag staff ang apektado man sang sobra nga init sang tiempo nga rason sang pagkanselar nila sang klase sa bilog nga hapon.
Suno pa sa iya, paagi sa blended learning, masiguro ang ikaayong lawas sang mga estudyante kag malikawan nga madugangan pa ang mga nagamasakit dulot sang sobra nga init sang panahon.
Dugang niya, tugutan lang nga makabalik ang mga estudyante sa ilo hulot kun safe na liwat ang mga estudyante kag manunudlo sa heat related incident base sa pagsulundan sang buluthuan.
