ILOILO CITY – Kumpiyansa si Manila International Airport Authority General Manager Cesar Chiong nga maklaro ang iya pangalan sa preventive suspension order batuk sa iya nagikan sa Office of the Ombudsman.
Kahapon, gin-anunsiyo ni Chiong nga ginpaidalom ini sa preventive suspension bangud sa isa ka reklamo nga naga-alegar nga nagkomiter siya sang grave abuse of authority.
Sa isa ka statement, ginpahayag ni Chiong nga nabaton niya ang preventive suspension order nga napetsahan sang Abril 28, 2023 nagikan sa Ombudsman.
Ginpahayag niya nga ang preventive suspension batuk sa iya ang ginpagwa matapos ang pag-reassign sang pila ka mga empleyado sang Manila International Airport Authority bilang kabahin sang iya programa nga pag-improve sang operasyon sang airport.
Base sa order sang Ombudsman, ginpaidalom sa preventive order si Chiong upod sa Acting Assistant General Manager nga si Irene Montalbo bangud sa gina-alegar nga grave abuse of authority kag grave misconduct.
Suno sa Ombudsman, nag-abuso si Chiong sa iya otoridad sang gin-designate niya si Montalbo bilang assistant general manager for finance and administration apisar sang unsatisfactory rating sini.
Gin-reassign man sini ang indi magnubo sa 285 ka mga empleyado.
Dugang pa sang order, nagagwa sa sworn statements nagikan sa mga reassigned employees nga wala sila napahibalo sang rason sang ila reassignment kag wala man sila sang pending nga administrative complaints.
Suno naman kay Chiong, maklaro ang iya pangalan kun pahanugutan siya nga mapresentar ang iya bahin nga ang reassignment sang mga empleyado ang kabahin lamang sang iya vision kag plano nga pag-improve sang airport efficiency kag financial standing sang authority. ‘
Ang pag-anunsiyo snag preventive suspension batuk kay Chiong ang naggwa isa ka adlaw matapos ang na-eksperyensyahan nga power outage sa Ninoy Aquino International Airport Terminal 3 nga nagresulta sa cancellation sang madamo nga flights.
Sa amo nga insidente, wala ginadula sang otoridad ang posibilidad nga pagpangsabotahe ang rason sang power outage.
