ILOILO CITY – Gin-aprubahan sang International Criminal Court ang request sang Philippine government nga makasabat sa arguments sang isa ka prosecutor may kaangtanan sa appeal sang pungsod batuk sa liwat nga pagbalik sang imbestigasyon anti-drug war sang Duterte administration.
Sa desisyon nga sang damlag lamang ginsapubliko, ginpahayag sang appeals chamber nga ang sabat sa pila ka issue nga gin-raise ni Prosecutor Karim Khan ang makabulig sa desisyon sa appeal.
Ginhatagan sang tubtob Mayo 16 ang Pilipinas agud nga makapasa sang sabat nga indi magsobra sa 10 ka pahina.
Sang November 2021, gin-suspend sang the Hague court ang imbestigasyon sa kontrobersyal nga drug war sang nagligad nga administrasyon kasunod sang deferral request nagikan sa Philippine government.
Apang, sang Enero subong nga tuig, ginpasugtan sang pre-trial chamber ang pagbalik sang imbestigasyon bangud nga indi ini kuntento sa developments sa local investigations.
Ang Pilipinas ang nag-appeal sa nasambit nga desisyon bangud nga ang tikang ang nagalapas sa soberanya sini kag ang chamber ang nagsala sa pila sini ka mga findings.
Sang Abril 4, ginpasa ni Khan ang 56 ka pahina nga sabat kun sa diin, ginhingyo sini ang International Criminal Court nga ibasura ang petition sang pungsod.
Suno sa prosecutor, ang gobyerno ang napaslawan nga magpakita snag sala sa desisyon sang korte agud nga mabasura ang imbestigasyon.
Dapat nga sabtan sang Pilipinas ang duha sa lima ka mga issues nga gin-mention sini suno sa appeals chamber.
Sa tion sang termino ni Duterte, suno sa state monitoring platform nga RealNumbersPH, masobra sa anum ka libo ka mga tawo ang napatay sa anti-illegal drug operations.
Apang suno sa local kag international human rights group, ang estimate ang mas mataas pa tubtob sa 12,000 kag 30,000.
