ILOILO CITY- Dismayado si Iloilo City Councilor Plaridel Nava kanday Iloilo City Mayor Jerry Treñas kag Governor Arthur Defensor may kaangtanan sa response sang duha ka local chief executives sa isyu sa kontrobersyal nga Ungka flyover.
Sa interview sang Bombo Radyo kay Councilor Nava, iya ginpahayag nga madugay na ang isyu sa flyover apang wala gid sang may nahimo ang gobernador samtang sa bahin naman ni Treñas,apisar nagapangakig ini,wala man sang konkreto nga resulta.
Suno kay Nava, mangin ang mga Ilonggo nga kongresista, kag iban nga mga local officials ang halos wala man sang mapag-on nga panindugan angot diri.
Pahayag sang konsehal, kun siya na gid lang ang magadala sang kawsa agud mapasabat ang mga tawo nga responsable sa palpak nga Ungka flyover, iya ini himuon.
Una na nga ginpahayag sang konsehal nga magapasaka ini sang kaso sa Ombudsman batok sa International Builders Corporation nga amo ang kontraktor sang kontrobersyal nga Ungka Flyover, kag sa mga opisyales sang Department of Public Works and Highways nga naangot sa proyekto.
Kaso nga paglapas sa Republic Act 3019 ukon Anti-Graft and Practices Act kag Gross Neglect of Duty ang i-file sini.
