ILOILO CITY- Liwat nga nasitahan ni Iloilo City Councilor Plaridel Nava si Councilor Rex Sarabia sa regular session sang City Council subong nga adlaw.
Sa ginpatigayon nga deliberasyon sa Committee Report ni Councilor Sarabia, naobserbahan ni Councilor Nava nga nagakadlaw ang bataon nga konsehal samtang nagahambal naman ang opposition councilor.
Hugot naman nga ginpanginwala ni Sarabia ang alegasyon ni Nava kag nagsiling nga nagkagat lamang ini sang dila bilang stress response.
Ginpanindugan naman ni Nava nga sigurado siya sa iya nakit-an nga nagkadlaw si Sarabia.
Nagpangayo naman sang pasaylo si Sarabia kay Nava.
Nahibaluan nga sa amo nga session, nagpabutyag si Nava may kaangtanan sa rekomendasyon sang komitiba ni Councilor Sarabia nga dapat mag-inhibit ang city council sa pag-desisyon sa reklamo sang iloy ni Councilor Nava nga si Lustresa Nava batok kay Punong Barangay Marites Nava, nga ikaduha nga asawa sang amay sang konsehal.
Matandaan nga sa session sang Abril 19, nagluntad man ang tensyon sa tunga sang duha ka konsehal matapos naakig si Nava sa aktwasyon ni Sarabia nga nagakaon sang popcorn sa tunga sang deliberasyon sang konseho.
