ILOILO CITY – Ginaluman kuntani ang pag-inaugurate ni Indian Prime Minister Narendra Modi sa isa ka bag-o nga high-speed train, ang Vande Bharat Express, bilang kabahin sang massive investments sang iya gobyerno sa pag-modernize sang railway network sang pungsod kag sang iban pa nga infrastructure.
Apang sa baylo, nagpadulong ini sa site sang isa sa pinakamalain nga rail accidents sa maragtas sang pungsod agud nga magpakigbahin sang iya nga simpatiya.
Nahibaluan nga masobra sa 280 ang napatay kag masobra sa isa ka libo ang pilason sa three-way crash nga ginkaulamiran sang duha ka passenger trains kag isa ka freight train sa eastern Odisha state.
Ang makamamatay nga hitabo sa syudad sang Balasore nga nagtay-og sa bilog nga pungsod sang India, ang nagresulta sa lapnagon nga panawagan sa otoridad nga hatagan sang igtalupangod ang safety issues sa railway system nga naga-transport sang masobra sa 13 million ka pasahero sa tagsa ka adlaw.
Apisar sang minilyon nga gasto sang gobyerno sa pag-upgrade sang sistema, ang tinuig nga pagpabaya ang nagresulta sa pag-deteriorate sang tracks.
Indi pa klaro sa subong kun ano ang rason sang insidente apang suno sa senior state railway officials, ang ginasuspetsahan amo ang traffic signaling failure.
Ang signaling failure ang nagakatabo bangud sang technical malfunction ukon human error, bangud nga ang traffic signals ang masami nga ginakaptan sang personnel sa tagsa ka istasyon.
Sa subong, nagmandu na ang otoridad sang “high-level inquiry” agud nga mahibaluan ang rason sang pagbunggu-anay.
