ILOILO CITY – Tatlo ang patay samtang walo ang pilason sa natabo nga pagpaniro sa isa ka community gathering sa downtown sang Fort Worth, Texas sa Estados Unidos.
Suno sa Fort Worth Police Department, may yara sang ginahiwat nga “ComoFest” sa 3400 Horne St. sang natabo ang pagpaniro.
Kalabanan sa mga biktima ang gindala sa ospital gamit ang pribado nga mga salakyan, samtang ang iban ang ginsakay sa ambulansya.
Isa ka tawo ang gindeklarar nga dead on the spot samtang ang duha ang napatay sang yara na sa ospital.
Nagdangat naman sa walo ang pilason kag nagapabulong sa nagkalain-lain nga ospital apang indi pa matumod ang ila nga kondisyon.
Suno sa kapulisan, 10 sa mga biktima ang adult kag isa ang menor de edad.
Indi pa klaro kun ang menor de edad ang lakip sa mga napatay ukon sa mga napilasan.
Sa subong, wala pa sang suspek nga natumod kag indi man klaro ang posibe motibo sang krimen.
