ILOILO CITY- Na-comply na sang Department of Education- Schools Division of Iloilo ang ginapangayo nga dokumento sang Regional Office my kaangtanan sa reklamo sang isa ka retired principal nahanungod sa iya retirement benefits nga indi pa ma-avail bangud may kulang nga requirement.
Matandaan nga sang nagligad nga semana, nagpa-Bombo si Jerome Gatungay, retired School Principal III sang Bingawan National High School, bangud nga iya gin-alegar nga apisar naka-secure ini sang certification halin sa Department of Education-Division of Iloilo nga nagapamatuod nga wala ini sang ano man nga nabilin nga accountability sa iya gin-avail nga DepEd-provident fund loan, nagapangayo gihapon ang regional office sang summary of payments.
Sa interview sang Bombo Radyo kay Mr. Leonil Salvilla, spokesperson sang Department of Education- Division of Iloilo, iya ginpahayag nga na-forward na sang Schools Division of Iloilo ang amo nga dokumento kag ginahulat na lang ang update sa status sini.
Suno kay Salvilla, ginapasiguro man nila nga kun may i-require pa gid nga mga dokumento, handa man sila nga i-provide ini.
Dugang ni Salvilla, mismo ang schools division superintendent ang nagaasikaso agud mapadasig ang pag-avail ni Gatungay sang iya benepisyo bilang retirado nga principal.
