ILOILO CITY- Magalawig lang sang tatlo ka adlaw ang temporaryo nga pagpasirado sa MO2 Ice sa Mandurriao, Iloilo City nga nangin epektibo las- singko kahapon sang hapon.
Ini kasunod sang mando ni Mayor Jerry Treñas may kaangtanan sa ginhimo sang menor de edad nga babaye nga halos naghublas samtang nagasaot kag nakuhaan pa sang video ang iya akto sa sulod sang bar.
Sa interview sang Bombo Radyo kay Mr. Norman Tabud, head sang Business Permit and Licensing Office, iya ginpahayag nga indi lang ang MO2 Ice ang ginpasirado kundi ang bilog nga complex nga nagalakip sang M02 kag MO2 Annex.
Suno kay Tabud, isa lamang ang permit para sa amo nga mga establishments gani sakop man ang mga ini sa closure order.
Dugang ni Tabud, mahimo naman nga magbukas liwat ang nasambit nga establishments sa Biyernes, las- singko sang hapon.
