Sa labing-una nga tion sa sulod sang 49 ka tuig, nakadaog na gid man ang men’s volleyball team sang Pilipinas sa Asian Games matapos sini ginlutos ang Afghanistan, 25-23, 25-16, 25-12, sa Hangzhou, China.
Naglawig ang hampang sa sulod sang isa ka oras kag anum ka minutos kun sa diin nagpanguna si Bryan Bagunas nga may 18 puntos nga ginsundan ni Steven Rotter nga may 13 puntos.
Wala naman sang player halin sa Afghanistan ang naka-skor sang double digits.
Ini ang pagbawi sang Pilipinas matapos nalutos sa kamot sang Southeast Asian Games champion nga Indonesia sang Martes sang gab-i, 22-25, 23-25, 20-25.
Magatakop ang preliminary round sang Pool F games sa pag-atubang sang Pilipinas sa powerhouse team kag Volleyball Nations League bronze medalist nga Japan subong nga Huwebes.
Nagapangatlo subong ang Pilipinas sa Pool F kag kinahanglan lutuson sini ang mga Japanese sa hampang sa Deqing Sports Centre Gymnasium sa Hangzhou agud nga maka-abanse sa round of 12. Ini bangud duha gid lamang ka mga team sa kada grupo ang hatagan sang tyansa nga maga-abanse sa knockout stage.
Ulihi nga nakahampang ang national’s men’s team sang Filipino spikers sa Asian Games sang 1974 sa Tehran kun sa diin nagpang-anum ang pungsod sa walo ka mga teams nga nagpasakop. #
