ILOILO CITY- Nagtuga sang kakugmat sa mga pumuluyo sang Taiwan ang paglunsar sang China sang satellite kun sa diin ang trajectory sini ang nag-agi sa airspace sang southern Taiwan.
Ini matapos nga nagpagwa ang Taiwan military sang nationwide emergency alert message nga nagapahibalo sa publiko apang sa baylo nga satellite, missile ang ginmitlang sa amo nga paandam.
Kasunod sini, gin-athag sang Ministry of National Defense nga nagsala lang ang announcement.
Nagpanawagan naman ang Public Warning Cell Broadcast Service sa mga tawo nga magpahibalo gilayon sa otoridad kun may magtupa nga mga debris sang unidentified objects sa ila palibot.
Nahibaluan nga ang satellite launch ang natabo apat ka adlaw antes magahimo sang desisyon ang mga Taiwanese sa pag- elect sang ila bag- o nga presidente sa Enero 13 nga presidential kag legislative elections.
Madugay naman nga gina-claim sang China nga ila teritoryo ang Taiwan.
