ILOILO CITY- Matapos ang ginpatigayon nga senate inquiry kahapon, magapatigayon man subong nga adlaw ang kamara sang kaangay nga inquiry kaangot sa apat ka adlaw nga power blackout nga nagluntad sa Western Visayas sang imbukada sang tuig.
Mismo si Iloilo City Lone Representative Julienne “Jam-Jam” Baronda ang nagduso sa pagpatigayon sang inquiry paagi kay House Speaker Martin Romualdez.
Magluwas kay Baronda, ginduso man nanday Representatives Raul “Boboy” Tupas, Michael Gorriceta, Francisco “Kiko” Benitez, Lorenz Defensor, James “Jojo” Ang, Jr., Dan Fernandez, Raoul Danniel Manuel, Arlene Brosas, kag France Castro ang inquiry angot sa lapnagon nga power outage.
Pangunahan ni Marinduque Rep. Lord Allan Velasco ang amo nga imbestigasyon in aid of legislation bilang chairman sang Committee on Energy.
Nagpasalamat naman si Baronda kay Velasco kag Romualdez sa madasig nga paghatag atensyon sa nagluntad nga power blackout.
Ginalauman nga magatambong sa hearing subong nga adlaw ang representative sang Department of Energy (DOE), National Grid Corporation of the Philippines (NGCP), Energy Regulatory Commission (ERC) kag mga electric power distribution utilities sa rehiyon.
Indi naman diri magtambong si Iloilo City Mayor Jerry Treñas apisar nga napadal-an siya sang notice sa amo nga imbestigasyon bangud ang mga gobernador lamang sang mga probinsya sa rehiyon ang gin-imbitar agud mangin resource speakers.
Suno kay Treñas, itugyan na lang niya kay Governor Arthur Defensor ang pagpautwas may kaangtanan sa tuman ka dako nga damage sa syudad nga ginabanta P2 billion pesos bangud sa blackout kag kun paano ini i-address.
