ILOILO CITY- Gin-athag ni House Deputy Majority Leader Erwin Tulfo nga wala sang mando si House Speaker Martin Romualdez nga iduso ang kampanya nga nagatuyo magtipon sang bastante nga pirma agud makatigayon ang publiko nga mag-propose sang amendments sa konstitusyon.
Suno kay Rep. Tulfo, wala man sang kamatuoran nga ang nasambit nga tikang kun magmadinalag-on ang ila mangin regalo kay Presidente Ferdinand Marcos sa tion sang iya masunod nga State of the Nation Address.
Ini nga pahayag sang ACT-CIS party-list congressman ang kasunod sang pahayag ni Senator Imee Marcos nga wala siya nakibot nga ang iya pakaisa nga Speaker ang naangot sa signature campaign para sa Charter Change.
Sa bahin naman ni former Ako Bicol representative kag subong Legazpi, Albay Mayor Alfredo Garbin Jr., iya ginpahayag nga ang signature campaign para sa people’s initiative sa iya probinsiya ang inisyatibo sang Albay chapter sang League of Municipalities of the Philippines.
Antes sini, gin-abi-abi man ni Romualdez ang tikang sang mga Senador nga amyendaran ang 1987 Constitution economic provisions paagi sa constituent assembly, buot silingon, ang tanan nga members sang kongreso ang magaboto sa proposed amendments.
Apisar nasaad sa konstitusyon ang natuhoy sa constituent assembly sa pag- amyendar sang Constitution, wala naman nasaad sa 1987 Charter kun ang tanan nga myembro sang bicameral Congress nga amo ang kamara kag senado ang dapat magboto sang tingob ukon separado.
Ang nagapadayon nga signature campaign sa pag- amyendar sang konstitusyon ang nagapamangkot sa mga tawo kun pabor sila nga bag-uhon ang Article 17 Section 1 sang konstitusyon paagi sa pagpahanugot sa tanan nga members sang kongreso nga magboto sang tingob sa proposed constitutional amendments.
Sa tion nga magmadinalag-on ang people’s initiative,ang House of Representatives amo ang magauyat sang otoridad sa pagboto para sa Constitutional amendments bangud may yara sila sang 300 ka mga myembro samtang may 24 lamang ang senado.
