Masako na sa training ang Gilas Pilipinas para sa nagahilapit nga first window sang FIBA Asia Cup Qualifiers subong nga Pebrero!
10 na sa mga myembro sang national team ang nagsulod sa training camp sa Inspire Sports Academy sa Laguna para sa apat ka adlaw nga paghanas. Ini amo sanday Justin Brownlee, Scottie Thompson, Kai Sotto, Dwight Ramos, Carl Tamayo, AJ Edu, Calvin Oftana, Chris Newsome, Jamie Malonzo, kag Kevin Quiambao.
Wala sanday June Mar Fajardo kag CJ Perez sa una nga adlaw sang training bangud bag-o gid lamang matapos ang Philippine Basketball Association (PBA) Commissioner’s Cup kun sa diin ang ila man nga team nga San Miguel Beermen amo ang nagkampyon.
Apisar nga yara si Edu sa training camp, kumpirmado nga indi ini makahampang para sa Gilas sa first window bangud sa gin-suprer sini nga injury sa Japan B. League campaign kag indi man ini available para sa national team tubtub sa Abril.
Indi pa maathag kun ano ang plano ni Coach Tim Cone para sa core team apang nakit-an nga yara man sa training camp si Japeth Aguilar apisar nga wala ini sa 12 ka napilian sang coach.
Nahibaluan nga pagkatapos sang apat ka adlaw sa Inspire Sports Academy, magapatigayon ang Nationals sang open practice sa PhilSports Arena sa Pebrero19 antes magkadto sa Hong Kong para sa labing-una sini nga hampang sa Pebrero 22.
Kun matapos na ang hampang sa Hong Kong, magabalik sa Pilipinas ang Gilas kag handaan ang hampang batok sa Taiwan sa PhilSports Arena sa Pebrero 25. #
