Gin-anunsyo ni Kate Middleton ukon si Catherine nga Princess of Wales nga na-diagnose man ini nga may cancer kag nagapaidalom na subong sa chemotherapy.
Sa video message ni Catherine, wala nasugid kun ano nga sahi sang cancer ang iya gina-suprer apang ginsiling sini nga nasuguran ang chemotherapy sang Pebrero.
Nadiskubrehan ang iya balatian paagi sa post-operative tests kasunod sang iya nga abdominal surgery sa tunga-tunga sang Enero.
Naghingyo man ang 42-anyos nga prinsesa sang privacy para sa ila nga pamilya.
Sang nagligad nga bulan, matandaan nga nag-anunsyo man ang hari sang Britanya nga si King Charles (amay sang bana ni Kate nga si Prince William) nga may yara man ini sang cancer kag nagapaidalom man sa treatment.
Halin sang nagpaidalom sa surgery si Kate, nabutang sa kontrobersiya ang pangalan sini bangud sa nagkalain-lain nga conspiracy theories.
Lakip dira ang pag-ako mismo ni Kate nga siya ang nag-edit sang ila family photo kun sa diin kaupod niya ang iya kabataan kag gin-release kadungan sang Mother’s Day sa United Kingdom. Nalakip man sa isyu nga nagadalahig sa pangalan ni Kate amo ang gina-alegar pagluib ni Prince William sa ila pag-asawahay kun sa diin gina-angot ini kay Marchioness of Cholmondeley Rose Hanbury.
