Tumalagsahon kag makatalandog-balatyagon ang natabo sa Gaza bangud natigayon pa nga masalbar sang mga doktor ang isa ka lapsag gikan sa taguangkan sang isa ka iloy nga napatay bangud sa pagpang-atake sang Israel sa syudad sang Rafah.
Ang iloy ang ginkilala nga si Sabreen al-Sakani kag nagabusong sang 30 na ka semana sang natabo ang airstrike sang nagligad nga gab-i.
Sa amo nga insidente, patay man ang iya nga bana nga si Shoukri kag ang ila isa pa ka tatlo ka tuig nga anak nga babaye nga si Malak.
Matapos nahibaluan sang responders nga nagabusong ang iloy, dali-dali ini nga gindala sa Kuwaiti hospital sa Rafah kag bangud kritikal na ang kondisyon sang iloy bangud naigu pati ang utok sini, kinahanglan nga isa lang sa ila sang bata ang luwason.
Nasalbar ang bata paagi sa ginpatigayon nga emergency caesarean sa iloy.
Nagapabilin ini subong sa incubator sa neonatal unit sang amo nga Emirati hospital samtang ginsunod naman ang iya pangalan sa iya nga iloy.
Tatlo tubtub apat ka semana ang itinir sini sa ospital bangud sa respiratory distress syndrome nga tuga sang premature birth.
Bangud ilo na ini kag nawad-an pa sang utod, magapabilin ini sa pagtatap sang iya nga Lola nga si Mirvat al-Sakani.
Nahibaluan nga ang overnight airstrike sang Israel sa Rafah sang nagligad nga Sabado kag Domingo ang nagbilin sang 19 ka mga patay, lakip na dira ang 13 ka kabataan gikan lamang sa isa ka pamilya.#
Source: AAP / Mohammad Jahjouh
