Gina-abi abi sang grupo sang mga manunudlo ang plano sang gobyerno nga pagbalik sa ‘traditional’ academic calendar nga naga-umpisa sa Hunyo kag magatakop sa Marso.
Ini ang kasunod man sang pagmando ni Presidente Ferdinand Marcos Jr., sa Department of Education (DepEd) nga ibalik sa daan ang academic calendar sa maabot nga School Year 2025-2026 bangud sa reklamo sang mga estudyante bangud sa tuman kainit nga tyempo samtang nagaklase.
Sa interview sang Bombo Radyo kay Vladimer Quetua, chairperson sang Alliance of Concerned Teachers, iya ginpahayag nga ang desisyon nga ini ang bunga sang isa ka survey nga ila ginpatigayon sang 2023.
Sa amo survey, nagwa nga masobra sa 67% sang mga manunudlo ang nakaeksperyensya sang tuman nga init sa mga classrooms.
Sa subong nga academic calendar, ang summer season ang nagatupa sa bulan sang Abril kag Mayo, ang panahon nga tuman kapaang ang mga classrooms para sa mga estudyante kag manunudlo.
Ang pagbalik sa Hunyo bilang umpisa sang klase ang patigayunon sa isa ka “gradual revert.”
Gin-ako man ni Quetua nga makaaapekto ang pagbag-o nga ini sa bakasyon sang mga manunudlo.
Suno kay Quetua, may yara sang 60 ka adlaw nga bakasyon ang mga manunudlo kada tuig, apang sa pagbabalik sa daan nga academic calendar, mahimo man mag-angkon sang pagbag-o sa kalawigon sang ila bakasyon.
Bangud sini ginatun-an na sang DepEd ang pagpataas sang numero sang service credits nga mahimo makuha sang mga manunudlo bilang compensation halin 15 days padulong sa 45 days.
