ILOILO CITY – Umpisahan na sang Iloilo City Government sang Lunes, Mayo 13 ang pagrasyon sang tubig sang mga barangay nga apektado sang water shortage.
Sa interview sang Bombo Radyo Iloilo kay Engr. Niel Ravena, pinuno sang General Services Office, iya ginpahayag nga kinahanglan anay sang Iloilo City Government nga magpagwa sang notice to proceed sa mga water distributors antes umpisahan ang pagrasyon sang tubig.
Suno kay Ravena, kahapon, nagpatigayon na sila sang post-qualification inspection sa water utilities nga Balibago Waterworks kag Metro Pacific Iloilo Water.
Ginpahayag ni Ravena nga katuyuan nila nga mahibaluan kun bala makasarang ang nasambit nga mga water utilities nga mag-supply sang tubig sa 35 ka mga barangay sa syudad.
Kuhaon naman ang buget sa pagbakal sang tubig sa P12.5 million nga quick response fund matapos ginpaidalom ang syudad sa State of Calamity bangud sa water shortage.
